ბათუმის სამედიცინო აკადემიისა და საქართველოს ჯანმრთელობის ფედერაციის თანამშრომლობით, ბათუმში სამედიცინო პერსონალისა და ექთნებისთვის პროფესიული ტრენინგები ჩატარდა. თანამედროვე ჯანდაცვაში ეფექტური კომუნიკაცია პაციენტის ნდობის, უსაფრთხოების, უფლებების დაცვისა და მაღალი ხარისხის სამედიცინო მომსახურების მნიშვნელოვანი საფუძველია. ამასთან, სტრესისა და ემოციების მართვა აუცილებელია როგორც პროფესიული მდგრადობისთვის, ისე ჯანსაღი სამუშაო გარემოს შესანარჩუნებლად.

• ტრენინგების ფარგლებში მონაწილეებმა განიხილეს:
• პაციენტთან ეფექტური და საერთაშორისო სტანდარტებზე დაფუძნებული კომუნიკაცია;
• ნდობაზე დაფუძნებული ურთიერთობა, ინფორმირებული თანხმობა და პაციენტის უფლებები;
• რთული კომუნიკაციის, კონფლიქტებისა და ემოციურად დატვირთული სიტუაციების მართვა;
• დეესკალაციის ტექნიკები, პროფესიული საზღვრები და გუნდური კომუნიკაცია;
• სტრესის მართვის პრაქტიკული მეთოდები და პროფესიული გადაწვის პრევენცია.

სწავლებას უძღვებოდნენ:

• მეგი საჯაია - საქართველოს ჯანმრთელობის ფედერაციის დირექტორი, საზოგადოებრივი ჯანდაცვის მაგისტრი, კომუნიკაციის ექსპერტი, მედიატორი და ჯანდაცვის ომბუდსმენი.
• თინათინ აიწურაძე - ფსიქოლოგი, ფსიქოლოგიის მაგისტრი, სოციალურ მეცნიერებათა დოქტორი და საქართველოს ჯანმრთელობის ფედერაციის ფსიქო-სოციალური მხარდაჭერის პროგრამების ხელმძღვანელი.

ტრენინგები ეფუძნებოდა რეალურ პროფესიულ შემთხვევებსა და პრაქტიკულ სავარჯიშოებს. მონაწილეებს ტრენინგების დასრულების შემდეგ შესაბამისი სერტიფიკატები გადაეცათ. სწორი კომუნიკაცია, ემოციების მართვა და პროფესიული განვითარება - პაციენტზე ორიენტირებული და უსაფრთხო ჯანდაცვის მნიშვნელოვანი წინაპირობებია. საქართველოს ჯანმრთელობის ფედერაცია და ბათუმის სამედიცინო აკადემია აგრძელებენ თანამშრომლობას სამედიცინო პერსონალის პროფესიული უნარების გაძლიერებისა და სამედიცინო მომსახურების ხარისხის გაუმჯობესების მიზნით.